Gait den Strieker (Gerbert Abbink)

Herinneringen an de olde spoorbaan van Gait den Strieker ofwel Gerbert Abbink.

Mien eerste herinnering an de spoorbaan begon in 1948.
Met regelmaot was de stoomfluite van de locomotief de “Sik” nuumd , in ons darp te heuren. Hi-j kwam met wagons d’r achter van uut Durkum naor Zelhem.
As ’t stille was dan was de eerste fluit al te heuren bi-j de aoverweg an de Heidehoekweg.
De tweede keer liet hi-j zich hören bi-j de aoverweg van de Veeninksbrinkseweg, now de Brinkweg. Direct door achter was d’r een wissel waor de machinist kon kiezen of hij naor de holthandel Oldenboom of naor de Coöperatie ging um de wagons te laoten lossen.

image

Bi-j de coöperatie mos de Sik” schuun aover de straote naor de laad en los brugge. Doorveur zetten hi-j de “Sik”achter de wagons zodat hi-j ze naor de brugge van de coöperatie en töt achteran de holthandel kon neerzetten. Soms kwam allene de “Sik” naor Zelhem um de wagons vol of leug weer op te halen.

Um naor de holthandel te gaon mos hi-j ok nog een keer de fluite laoten hören bij de aoverweg van de Zuivelweg.

image

Dan achter de veewaoge en het olde stationsgebouw langs dat töt kantoor was um ebouwd. ’t Spoor eindigen töt ’t stootblok dat vlak achter de woning van de Familie Oldeboom ston. Op de bestaonde rails had de holthandel een antal lorrie’s die ze gebruukten um’t holt op de holtplast te vervoeren. Disse lorrie’s waren veur ons as blagen een mooi spölgoed maor dat werd deur de directeuren Oldeboom niet zo op pries esteld.
’t Vervolg van de olde spoorbaan begon net aover de Halseweg naost de Vivo winkel van G.Becking, now de Coöp supermarkt. De olde bane was vol epot met struuken en bömen. An de rechterkante was een pad emaakt veur de fietsers.De bane lag iets hoger as de landeri-jen doornaost. De eerste aovergang was nao zo’n 100 meter. Links via een zandweg via de Polweg naor de Palmberg en rechts naor de Pol. Now de Jacob van Ruysdaelstraote.
Weer vieftig meter wieter was d’r een klein landweggetje waor a’j links deur ‘t land op de Palmberg kon kommen en rechtsaf, langs de beukenhegge naor de boerderi-je van Buunk van de Pol. Wieterop kruusen hi-j nog de Zandvoortweg. Wi-j gingen vake niet wieter dat töt “’t witte” bruggetje den aover een kleine bekke ging en woor wi-j o.a stekkel baarsjes vingen en lekker met water konnen knoeien.
End jaoren zestig werden de rails veur de coöperatie dicht elegd met panlatten as d’r een wielerronde werd ehollen met as start en finisch veur de coöperatie.
Gait den Strieker